康子【 短歌行 】：131 【 今夏巴黎，冇衫可買 】

今年夏天的法國行程：馬賽➡️普羅斯旺➡️巴黎。
既到巴黎，當然要買衫。也不想隱瞞，每次出行，總是誓神劈願「節約」，一定不再買靚衫，衣櫃已逼爆！
沿途，總是看著聰明朋友買買買，慶幸自己意志堅定，夠慳家。
到旅途尾段，行經男裝店：啊，這件褸實在太正，不買不行；結果只買一件，花費超過朋友的全程總和。
唉，每次都是衰收尾（ 2024年4月22日《 繁華路，花月正春風 》系列 ）。
尤其是去到老相好「Olden」，与老闆有交情，正是：「衣不勝新，人不如舊」，不買两三件，實在說不過去。
偏偏，今次如有神助，斷念！
原因很簡單，2026年夏天的時裝潮流，竟然是開正「麂（猄）皮」。
我們都知道，猄皮不是真的黃猄皮，而是將牛/羊/豬皮去毛加工，造成短絨面效果。
但是一來嫌熱；二來打理超麻煩，最忌濕水；試問在酷暑的香港，点著？
奇在歐洲各大名牌，居然同心合力，在今夏齊齊推出猄皮衫：配皮革，配綿紗，配牛仔布，甚至配絲綢（！）。
論創意，夠突破；論造工，夠高超。可是在今夏，歐洲受多重熱浪強襲；英德两國乾旱；法國及西班牙，正燃燒戰後以來最惡山火，你仲叫我著猄皮？
做到咁絕，好，乾脆唔使買。可能去年歐洲反常的凍，有專家以為今年會迎來「冷夏」，於是入錯貨，開錯料。
点算？返到來香港，名牌店統統一樣：猄皮猄皮猄皮，只是睇，已熱死人。
不過 Tom Ford 有一件深綠色的猄皮短外套，好鬼靚，褸面有種温柔的光澤，像綠寶石。
可以先買下，留待秋冬穿，不妨考慮……。🤣